Act 16 | NdeIBE | STEP | Wafika eDebhe wedlulela eListra lapho okwakuhlala khona umfundi owayethiwa nguThimothi, olonina owaye ngumJudakazi, elikholwa, kodwa uyise engumGiriki.

Acts 16

UThimothi Usebenza LoPhawuli LoSila

1 Wafika eDebhe wedlulela eListra lapho okwakuhlala khona umfundi owayethiwa nguThimothi, olonina owaye ngumJudakazi, elikholwa, kodwa uyise engumGiriki.

2 Abazalwane baseListra lase-Ikhoniyami babembuka. 3 UPhawuli wayefuna ukuhamba laye, yikho wasemsoka ngenxa yabaJuda bakuleyondawo ngoba bonke babekwazi ukuthi uyise waye ngumGiriki. 4 Ekuhambeni kwabo kulelo lalelo idolobho, babezethula izinqumo ezenziwa ngabaphostoli labadala eJerusalema ukuze abantu bazilandele. 5 Yikho amabandla aqiniswa ekukholweni abantu banda mihla yonke.

Umbono KaPhawuli Ngendoda YeMakhedoniya

6 UPhawuli labaphelekezeli bakhe balibhoda lonke elommango waseFrigiya laseGalathiya, uMoya oNgcwele esemalele ukuthi atshumayele ilizwi elizweni lase-Asiya. 7 Bathi sebefike emngceleni waseMisiya, bazama ukungena eBhithiniya, kodwa uMoya kaJesu kawubavumelanga. 8 Ngakho bedlula eceleni kweMisiya behlela eThrowa. 9 Ebusuku uPhawuli wehlelwa ngumbono wendoda yaseMakhedoniya imi imncenga isithi, “Woza eMakhedoniya uzosisiza.” 10 UPhawuli esebone umbono lowo, sahle salungisa masinyane ukuthi siye eMakhedoniya, sibona ukuthi uNkulunkulu wayesibizile ukuba sitshumayele ivangeli kubo.

Ukuphenduka KukaLidiya EFiliphi

11 Sasuka eThrowa sawela ulwandle sandenda saqonda eSamathrake, kwathi ngakusasa sedlulela eNiyapholi. 12 Sesisuka lapho saya eFiliphi, elaliyilona dolobho elikhulu lesiqinti seMakhedoniya eyayibuswa ngamaRoma. Sahlala lapho okwezinsuku ezinengi.

13 NgeSabatha saphumela ngaphandle kwamasango omuzi saya emfuleni sifuna indawo yokukhuleka. Sahlala phansi saqalisa ukukhuluma labesifazana abase bebuthene khonapho. 14 Omunye walabo ababelalele ngowesifazana okwakuthiwa nguLidiya, umthengisi welembu eliyibubende evela edolobheni laseThiyathira, engumkhonzi kaNkulunkulu. INkosi yayivula inhliziyo yakhe ukuba emukele ilizwi likaPhawuli. 15 Kwathi yena kanye labendlu yakhe sebebhaphathiziwe, wasinxusela emzini wakhe. Wathi, “Nxa lingemukela njengekholwa eNkosini, wozani lizohlala endlini yami.” Wasincenga savuma.

UPhawuli LoSila Entolongweni

16 Ngelinye ilanga sathi sisiya endaweni yokukhuleka sahlangana lentombazana eyayiyisigqili, ilomoya wokubonisa ikusasa. Yayizuzela abanini bayo imali enengi ngalokhokuhlahlula. 17 Intombazana le yalandela uPhawuli lathi sonke imemeza isithi, “Amadoda la ayizinceku zikaNkulunkulu oPhezukonke, alitshela indlela yokusindiswa.”

18 Yakwenza lokhu okwezinsuku ezinengi. Ekucineni uPhawuli kwamjinga lokho waphenduka wathi kuwo umoya, “Ngiyakulaya ngebizo likaJesu Khristu ukuthi uphume kuyo!” Umoya wahle waphuma kuyo khonapho.

19 Abanikazi bentombazana bathi ngokunanzelela ukuthi ithemba labo lokuzuza imali lase linyamalele, bababamba oPhawuli loSila babadonsela enkundleni yokuthengisa ukuba bayoqondana leziphathamandla.

20 Babamisa phambi kwabomantshi bathi, “Amadoda la angamaJuda asebedunga idolobho lakithi 21 ngokukhuthaza imikhubo engaphandle komthetho ukuthi thina amaRoma siyamukele kumbe siyilandele.”

22 Ixuku layingenela indaba yokuhlasela uPhawuli loSila, yikho omantshi bathi kabakhululwe izigqoko batshaywe.

23 Sebebabhansule kabuhlungu babaphosela entolongweni kwathiwa umlindijele kabakhangele aqinisise. 24 Esezwe lowomlayo wabafuqela endlini yentolongo ephakathi wababopha izinyawo wazibophela ezinsikeni.

25 Sekungaba phakathi kwamabili ebusuku uPhawuli loSila bakhuleka bahlabela amahubo kuNkulunkulu, ezinye izibotshwa zibalalele.

26 Masinyane kwaba lokuzamazama komhlaba kwaze kwanyikinyeka izisekelo zentolongo. Izivalo zentolongo zathi gwabu zavuleka, amaketane ezibotshwa athukuluka.

27 Umlindijele waphaphama, wathi ngokubona iminyango yentolongo ivulekile wakhokha inkemba yakhe esefuna ukuzibulala ngoba ekhumbula ukuthi izibotshwa zasezibalekile.

28 Kodwa uPhawuli wamemeza wathi, “Ungazilimazi bo! Sikhona sonke!”

29 Umlindijele wathi kakulethwe izibane, wangena wazilahla phambi kukaPhawuli loSila eqhaqhazela. 30 Wasebakhuphela phandle wababuza wathi, “Madoda, ngenzeni ukuze ngisindiswe na?”

31 Baphendula bathi, “Kholwa eNkosini uJesu, uzasindiswa – wena kanye lendlu yakho.”

32 Base bemtshumayeza ilizwi leNkosi kanye labanye abendlu yakhe. 33 Ngalelohora lebusuku umlindijele wabathatha wabagezisa imvimvinya zabo; kwasekusithi khonokho nje yena labendlu yakhe bahle babhaphathizwa.

34 Umlindijele wabesa endlini yakhe wabapha ukudla. Indlu yakhe yonke yaba lokuthokoza ngokuba base bekholwa kuNkulunkulu.

35 Kwathi sekusile omantshi bathuma amanxusa abo kumlindijele lalo umlayo othi; “Bakhulule abantu labo.” 36 Umlindijele watshela uPhawuli wathi, “Omantshi sebethe wena loSila kalikhululwe. Selingahamba. Lihambe kuhle.”

37 Kodwa uPhawuli wathi emanxuseni: “Basibhaxuza phambi kwabantu singazange sithonisiswe thina singamaRoma agcweleyo, basiphosela entolongweni. Kanti manje sebefuna ukusikhupha ngasese na? Hatshi! kabeze bona ngokwabo bazosikhupha.”

38 Amanxusa akubika lokhu kubomantshi abathi ngokuzwa ukuthi uPhawuli loSila babe ngamaRoma agcweleyo bethuka. 39 Beza ukuzabancenga, babakhupha entolongweni, babacela ukuthi basuke kulelodolobho.

40 UPhawuli loSila sebephumile entolongweni baya endlini kaLidiya lapho abahlangana khona labazalwane babaqinisa. Basebesuka behamba.